CERPEN MADURA: Joko Tole Aperrang Kalaban Dempo Abang
Assalamualaikum warahmatullahi wabarakatuh
Semba songkem abdhidhalem. Abdina Patmo dari Pasongsongan, badhi ngatorraghi dungngeng kalaban bul-ombul Joko Tole Aperrang Kalaban Dempo Abang.
Ngireng peyarsaaghi!
Ampon kalonta, bada settong rato sakte tor tadek se bisa nandinge. Rato Bermana asma epon.
Rato Bermana ngagungi settong potra se asma epon Dempo Abang.
Saampona potrana dhibasa, Dempo Abang epakon dhuli akabin sareng rama epon.
“Kacong, satiya be’na la dhibasa. Sapantessa bekna dhuli akabin, nyare ban pele potre seekasennenge, deggi’ pas elamara kalaban sengko’ “
“Bunten Rama, abdhina tak akabina tor ta' nyareya potre se raddhin. Namong abdhina andhi' pangaterro, sakabbhinna bebini’ se gi’ paraban, abdhina terro anikmadhagiye ta' kalaban apolong tedhung“
Mireng pangaterrona potrana se ta' maso' akkal kasebbhut, ramana takerjet.
Namong amargha Dempo Abang potra se ekasennenge, sadhaja pangaterro epon e torodhi.
Saamponna gapaneka Dempo Abang nyo'on kaangghuy ebhediyaghi settong parao se bisa ngabang neng bang – abang se e lengkabhi kalaban prajurid sareng paraladhen perrang. Sadhajana se'ekasokane ekabbuli.
Saamponna ghapaneka Dempo Abang meyos alajer nojju dha’ naghara Cena. Saamponna tandhuk de' lon-alon, rabu epon Dempo Abang e panggi'e kalaban oreng karaton, otama epon Rato Cena, tor epareksane tojjuen epon.
"Pasera asmana, tor ponapa tojjuenna, rabu de' naghara Cena? "
“Kennal aghi nyama sengko' Dempo Abang, ana'na Rato Bermana. Se dhari naghara Kelleng.
Tojjuen sengko' dhateng, kaangghuy ngala’ paraban-paraban sonte e naghara Cena kalaban tedhung ta' apolong.”
Saampona ghapanika, Rato Cena takerjhat mireng maksod sareng tojjuwan Dempo Abang se korang ajer. Rato Cena ta' kasokan.
Panggibad kadhaddhien ghapeneka adhaddhiaghi paperrangan, saengghana bennya' dhari prajurid Cena sedha.
Ta’ kantos abit naghara Cena epakala, saengghana Dempo Abang bisa nekkane pangaterrona.
Saterros epon, Dempo Abang nojju dha’ naghara laen. Sadhajana epakala tor ekobesane
Ta’ abid saampona ghapaneka, Dempo Abang nojju dha’ tana Jaba.
Saterros epon Dempo Abang abaktha sorat de' Rato Majapahit.
Saampona bedha e Majapahit, Dempo Abang ngerem sorat dha’ Madura se etojjuaghi dha' Joko Tole.
Saamponna sorat etarema tor e maos sareng Joko Tole, Joko Tole duka sambi adhabu dha' otosan epon.
“Koca’agi ya ka tuanna ba’na, sorattha la etarema ban sengko’. Apa maksoddha sengko' la ngarte. Bile’e bhei tuanna be’na se aperranga, sengko' paggun alaban. Ben pole kabale ya ka Dempo Abang, mon jet lakar lake’ mayu aperrang, settong labhen settong”.
Saterros epon otosan ghapanika abeli dha' Majapahit.
Saampona tandhuk e Majapahit, otosan gapanika apareng oneng ponapa se edhabuwagi Joko Tole.
Dempo Abang pas ngamok, aghagherja saellana mireng dhari otosan ponapa se e dhabuaghi Joko Tole.
E bakto gapanika jugen, Dempo Abang meyos nojjhu dha’ Songennep.
Ta' abit salastarena ghapaneka, Joko Tole ngoladhi parao ngabber e langngi’ mongging lao'.
Joko Tole adhikane jerenna Se Megaremeng. Hehehee... Joko Tole pas ngateteni jaran epon.
Megaremeng ngabbher ka langngi’ kaangguy ngaddhang paraona Dempo Abang.
Sekaduwa sajen semma’ ban akherra deddhi peperrangan eyattas langngi’ se cokop abit.
Sekaduwa saleng tabra’, selang antam tape sekaduwa tadhe’ se kala, tadhe se mennang karana padha sakte.
Tape saabidha paperrangan ayattas langnge' jeren se Megaremmeng ngamok terros. Joko Tole mondhut cometthe, peccot se eparenge Adi Rasa, majhadhi' epon.
dhepa’ elenggnge' attassa tase’, parao Dempo Abang pecca polana tandhu’anna jerren Se Megaremmeng.
Tak kantos abit, Joko Tole meccot ngangguy comettena se nyebabbagi Dempo Abang mate ban paraona togel maduwa. Saparo nyellem ka tase', saparona pole gegger e dhara'.
Menorot careta, saparo paraona gegger e Dhisa Dempo Temor, Kacamadhan Pasean Pamekkasan, e nyamae Gunong Parao.
Dineng salendang para potre seampon tade' parabanna gegger e Dhisa Dempo Bara' Kacamadhan Pasean e nyamae Kampong Potre. []
Ampon totok Dhunggngeng basa Madura. Melle jamu ka pamekasan : melle peccot ka gapura # Abdinah Patmo utusan dari Pasongsongan : sala lopot nyuon sapora.
Komentar
Posting Komentar
Berkomentarlah dengan sopan agar kita bisa memberikan pengalaman yang baik untuk pengunjung. Terima kasih.